Ghaxaq Festival ta-Mużika

Kien kunċett sempliċi iżda mill-aktar innovattiv. L-idea kienet dik li jiġi offrut aċċess lill-pubbliku ġenerali għal mużika ta’ kwalità minn artisti ta’ fama fuq skala internazzjonali. L-idea ġiet ibbażata fuq il-ħsieb li l-qalba tar-raħal isservi ta’ xenografija mhux tas-soltu għal dawn it-tip ta’ kunċerti fil-quċċata ta’ sajf sħun malti. Dan il-ħsieb kien kuntrast qawwi għall-avvenimenti mużikali tal-massa li dejjem jittellgħu fl-istess postijiet, bl-għażla verament mhux solita ta’ raħal tipiku Malti bħala meta mużikali.

L-istess festival kellu l-element ġenjali li apparti li jirriċerka talent mużikali internazzjonali b’mod li jiġu mwassla f’pajjiżna, kien ukoll joħloq l-opportunità tad-deheb lil talent mużikali Malti tal-mument li jkollu ċ-ċans għal pedana u udjenza kbira fejn jkun jista’ juri x’jaf.

Din it-taħlita fejn lok mhux tas-soltu ’l-bogħod mill-inħawi tas-soltu, li jwassal għall-spettaklu b’artisti mill-aqwa, kienet riċetta li rnexxiet bil-kbir. Il-pubbliku fisser is-suċċess bla qies ta’ din il-formula innovattiva għal pajjiżna. L-attendenza massiċċa u l-kummenti ta’ tifħir fuq il-midja nazzjonali kienu indikazzjoni tajba ta’ kemm dan l-ewwel festival f’Ħal Għaxaq kien mess il-polz tal-poplu.

Iżda mhux biss. Apparti li kien fenomenu ta’ komunità, kien ukoll strateġija ta’ pubbliċità bi promozzjoni soda li kienet kapaċi tolqot ukoll is-settur turistiku li f’dak il-perjodu jkun għaddej b’saħħa f’pajjiżna. It-turisti mhux biss waslu sal-miġemgħa tal-festival iżda terqu bi ħġarhom fit-toroq, fll-pjazez u l-isqaqien Għaxqin armati bil-lest għall-festa tar-raħal b’mod li ġew imħajra jiskopru Malta oħra aktar vera, u forsi anqas ippubliċizzata.

In sinteżi, l-essenza ta’ dan il-proġett kien proprju dan: festival mifrux fuq jumejn b’ġurnata għall-artisti Maltin u l-gran final bl-artisti ta’ fama mondjali. Kollox fl-isfond ta’ raħal Malti armat għall-festa mdawwar qaqoċċa mal-Knisja barokka mdawla b’elf bozza ta’ kull lewn.

Hu festival li jmiss il-qlub għax hu verament iċ-ċelebrazzjoni ta’ komunità f’esperjenza ta’ kollettività sħiħa fejn kulturi, razez, reliġjonijiet u diversità varji jiltaqgħu f’sens ta’ fraternità waħda.

U dan kollu dejjem f’isem il-mużika!